A ! Mi pans zot la vi ali ! Mi éspèr, konm moi, zo la bien avèy sa...in vré spéktak, vèy pa !té bon fé pass sa dann lékol téat sansa lékol la kominikasyon....Komansa ?..zot la pa vi ?.. A bon, zot té apré rogard fèyton, zot té apré rogard Marina.

Donkalor, zot la vi pa mésyé Préfet, mèt ali an kolèr kan la anparl ali lo pri gazoil Mayotte. Pars la-ba le pri la bien béssé..Li la vni roz, li la vni rouz, son vènn de kou la gonflé épili la di, i pé konpar aryenk sak lé bon pou konparé...sak i pé pa konparé, i fo pa fé.

Bon ! Si mi konpran bien,Mayotte i ansèrv in karbiran mové kalité...Banna la-ba lé pa oblizé ramas in rézèrv..étsétéra-étsétéra-la ké-lo-ra. Oté ! Fèr kroir sa in métyé vréman, sa !..Épi, sak i kont sé pa an avoir rézon vréman, sé fèr konm si, épi tan myé si zournalis i aplati ali dovan ou..

Parlfèt, kissa i koné bien problèm lésans, si la pa mésyé Prefet ? Kisa, i koné formil mazik i pèrmèt kalkil lo pri ? Sé li-memm ! Alor akoz li vien pa dann télé, pou ésplik anou, prèv-a-l’apui koman lé shoz i éspas...Pou kosa i gingn pa fé isi, sak i fé la-ba dann Mayotte..

Nou bann ti-kolon, nou la bézoin in bon lésplikasyon... pa in lésplikasyon an mayi kas-an-dé.

Justin