Mon shèr nové, ou k’i di k’li èm listoir, k’lé pou k’i konsèrv la mémoir bann gayar zafèr, konm sak lé mové, la guèr, la mortalité tousala... Ou la di ète kontan nout ti prézidan la di shak marmay kour moiyin i doi konète lo nom in marmay juif té assassiné pandan la dézyèm guèr mondial... Konm mi koné aou, jis akoz sé li, ou sar kont ? Éya, in tète dir i rète in tète dir. Alé, rovoir, spès vo arien bien bonzour Zistine épi son bann ti zèrb sinpol.

Mon shèr matante, si ou la bien ékout la radio, ou la antann tout démoun la pa bate la min pou sak lo prézidan la di. In pé la mèm di, la pa bann marmay dizan pou port la kroi akoz dann tan, inpé la fé dé shoz k’i fo pa fèr. Mèm madam Simone Weil, té dann kan la mor étan marmay, la di sa la pa bon !

Épi, moin la fine di aou, out bann kozman an kit-ta-bouète, wi pé gard pou ou. Pou moin sa lé konm délo dsi fèy sonz. Si out prézidan, nana arienk bon lidé konmsa, li lé pas sové ! Tan k’aou, si na in kouyonad pou trap a la vol, ou lé la ! A rovoir, mon vié matante !

Justin