L’avé poin bonpé, mé tazantan l’avé lo train voiyajèr épi lo train marshandize... Aprésa l’avé lotorail. Mé mi rapèl bien kan zèrb la savane té rouz épi té sèk lété pa rar zétinsèl té i mète dofé dann la savane.

Pou kossa dofé téi pran ? Pars lo kondission lété bon pou fé parnde ali.

Dofé i pran kan bande kondission lé réini pou li pran. La sossyété lé parèye, mé la pa lo klima natirèl ni anparl. Ni anparl lo klima sossyal. Sa i sava, sa i vien, é momandoné tangaze i pète pars la sityassion lé pi siportab. Mé pi siportab-la, sa i désside pa par dékré, i désside pa dann liv an suivan in kode partikilyé. Par l’fète, mèm bande gran politolog i gingn pa prévnir si tèl lévénman, sansa in n’ote, i pé déklansh in gran dézorde sossyal.

Toute fasson mwin la fine oir bande gran politolog i anons pa arien par avans, mé ka n la finé pété, zot i étidyé lo pou kossa. Zot lé pa dovinèr biensir. Zot lé sinploman konstatère… Dann déssèrtin péi, in sinp laksidan dsi la route i pé provok in komansman d’révolission. Dann d’ote sé la fain tou sinploman, sansa la vi shèr, sansa bande traka l’admministrassion i mète demoune dodan k’i pé provok sa. Issi La Rényon nou la di sé lo sistème néokolonyalist ké l’apré pouss demoune a boute.

Yèr mwin la ékrir :

« Lo vré rézon, sanm pou mwin, é mon parti - sirtou bande gran dirijan nou l’avé l’ané 1959 - la fine di sa dopi lontan, sé pars nou néna in sistème lésploitassion k’i apèl lésploitassion néo-kolonyalist é k’i ral anou toultan déyèr. L’inégalité ? Sé li.L’inzistis ? Sé li. Lésploitassion ? Sé ankor li. La vi shère bazé dsi in sitème konsomassion li la inpoze anou ? Sé li. La pèrte nout shans ? Sé li touzour. La Mizère pou in bonpé ? Sé li galman. »

Mé pé s’fèr la pa lo sistème néo-kolonyalis an li mèm va provok lo boulvèrsman sossyal, mé in sinpe lévènman nora pétète in rapor do loin avèk lo sistème ké va provok ali. Mézami si ni sava aligne, inn apré l’ote, toute lo malkontantman lo pèp rényoné, nou va oir néna do koi fé pété. Mé pétète va pété, pétète i pète ar pa, pétète sé in sinp pti fé divèr.

Final de konte, in sinp létinsèli vienabou mète dofé dann la savane. Mi sava pa di dann kann mé kissa k’i koné.

Justin