Mézami, mi sorte lir lo lète la plate-form la gosh la ékrir lo miniss Vals pou dir ali son mo dsi la konstrikssion –i di ossi rokonstrikssion-La Rényon é pou mon par mwin la bien apréssyé k’i ékri ali rofèr lé shoz parèye o mèm pou in réparassion lé possib mé fèr konmsi sak la fé dopi lontan lété bien lavé kékshoz k’i rossanm in lérèr.

Mwin pèrsonèlman si i pran lé shoz d’in poinnvizé solman téknik néna kékshoz mi panss lé insifizan vu toute déga siklone Garranss la fé La Rényon.Dabor néna késhoz lé pa démokratik pars nou rényoné nou la fine mète la bétiz déryèr nou’nou lé kante mèm in pé pliss ékléré koméla- é nou néna noute zidé dsi la fasson k’i fo fèr pou fèr myé dann noute péi… Sa i vé pa dir fèr pli shèr mé a inn kondission sé k’i ékoute lo pèp é pou ékoute ali lé pa lkonpliké i fo done ali la parol.

Done ali la parol kansréti avèk la mobilizassion bann fors viv noute péi. Mi trouv sa lé pa ditou in diskour partizan.Sa la pa in manyèr drèss lé z’inn konte lé zot mé inn fasson pou mobiliz noute fors viv pou alé pli vite, antouléka pli myé, pou mète noute péi dsi l’shomin ni vé amenn ali dopi lontan dizon dann shomin in dévlopman réspéktyé pou la natir épi lanvironeman.

Dopi dé zané-dopi mèm plizyèr mandatir bann Prézidan- mi an souvien bien la konsilt lopinion piblik rényonèz,la di dé shoz intéréssan, dèssèrtenn la mèm fé avanss lo péi mé momandoné néna kékshoz k’i klosh.Mi panss sa i vien par lo sistèm li mèm épi bann féodalité li la mète an plass firamézir si tèlman la réform lo sistèm la vni inpossib par rapor bann zintéré an zé- inn sèrtènn fasson d’sorte par la porte pou rante par la fénète épi garde bann blokaz néna dann lékonomi épi la sossyété.

Mézami si konm mwin zot i lir la lète la plate-form mi panss zot ossi zot i pé dona ali rézon.

A bon antandèr salu !