Zot i koné in fizi dé kou koman sa i lé ? Li na dé kanon, dé ké d’détant. Akoz moin l’apré di azot in nafèr, zot i koné mié k’moin ? Akoz moin l’apré mazine Virapoullé - si li té égzis pa, nar té oblizé invant ali ! - sa in fizi dé kou pou vréman sa : soman, dann promié kanon, nana in bal-a-blan i fé dézord, pa plis ; l’ot nana in vré bal dédan. Promié kartoush, sé tout promès li fé, épi i arète la-mèm ; dézièm kartoush, sa sé pou tir dsi tout bon prozé, li lé pou arien anndan.

Ala li vé fé in "quai en eau profonde" pou amène sarbon pou lizine boi-rouz. Arienk sa ! I di pa lo mèr Sin-Loui i vé fé inn son koté ! Mi éspèr sar assé kré pou antèr zot dé kouyonis.
Akoz sak Virapoullé i vé sé anpèsh fé lo tram-train : ala lo vré kartoush dann son dézièm kanon... Mi éspèr son trikmardaz va kas par bout, sinonsa, bann rénioné, dann inn-dé zané, sar dann malizé.

Kan o zistoir d’kai, sa va fé konm lotèl vinn-sink zétoil, Virapoullé la di va fé dépi o moin trantan si la pa plis. Ziska zordi, ni oi pa arien. Poitan, in lotèl pié dann lo, sa lé dos mon koko ! Alé in pti léfor gramoun, bate in pé tanbour la-dsi !

Justin