Aforss, aforss banna va rann a nou fou si i kontinié konm sa. Ala ké mi aprann, konm bann la ot i di, mi aprann de la boush d’in miniss de la répiblik ké “Pou mié kréé d’lanplwa i fo nyabou lisansié pli fasilman“ in fason pou zot di “Si na pwin travay sé touzour la fot bann travayèr“. I di pa sa dirèktoman konm sa, i di sa in pé an bié touzour, zot lé parti gran lékol pou sa. Lo travayèr i gingnré tro larzan kan li lé lisansié, donkalor anon fé in lwa pou plafonn tousala. Lo pridonm i ansèrvra pi aryin vik lo gouvèrman i désid fé lo pri sontousèl.

Lé vré, banna la fé gran zétid pou mié ésplik a nou, dikou i di pa plafonn lo prim dé lisansiman, i di plafonn lo zindimnité de dépar, lé byin zoué kanminm, konm si sé touzour lo travayèr ki vé alé. Dopi lo tan, néna i di, minm shé bann sosialis, néna i di i fo plafonn lo salèr bann patron, i fo plafonn lo bénéfis banna, i fo siprim lo rotrèt shapo, la, zorèy koshon dann marmit pwa. Na pwin inn i bouz, konm si zot lé la aryink pou ansèrv in sèl koté é sé touzour lo minm ki gingn, sé touzour si koté drwat. Arèt angrèss lo gro, odrémié éd lo fèb in kou.

La pou lo kou lo patron i poura lisansié san donn in lésplikasyon kikonk konm i di, li poura lisansié san motif in pé i di. Pétèt néna lantropriz néna bozwin in lèd, mi diskonvyin pa, nout tout i pé konprann zordi in lantropriz i pé èt dann in tramay, bann ti ousinonsa bann mwayinn lantropriz mé pa tout. In pé i di konm sa, banna la fé in lwa pou rann fléksib lo manièr travay. Alorss sé pou rann fléksib lo manièr travay ousinonsa pou rann fléksib lo travayèr ? Sanm pou mwin sé plito pou rédi lo travayèr !