Lakey lo sit > Chroniques > Oté
In manièr anblouz a nou
samdi 28 févrié 2015, sanm
Mwa d’zanvié 2015, zis dé mwa dérièr mi lir dann in zournal an frans, konm i di in gran zournal dapré mwin sérié, mi lir « Pétrol 50 dolar lo baril, néna in risk résésyon pou lo séktèr pétrolié »é li di, dopi lo landmin la kris 2008 zamé nou la vi in dégringolad konm sa. An gro i di pou rézon néna bonpé péi i produi pétrol zordi, pétrol néna an poundiak partou donkalor la pa zordi la vèy pou lo pri roprann a la os. Li arzout èk sa, lé byin èz lo kour nora tandans désann. Dopi tan la, a nou osi nou la rosanti inn ti diminisyon si lo pri, mé zordi, plito domin tout i ropar konm avan.
Dikou banna té i provwa in bès dirab. Sé sak bann éspésialis té i provwa dapré zot vik la krwasans lé fèb, é vik néna dot péi i prodwi, lésans i ariv i sort Lirak, Lafrik do louès, Brézil, Kanada, Eta-Zini é oilali-é oilala. Konm pou lésans, ala zordi i anons a nou in bès pou shomaz. Minm si néna inn ti lakalmi pou mwa d’zanvié, sétadir inn ti guin bès, ryin i pérmèt a nou di, somaz i bès pou vréman, sanm pou mwin i fo atann in pé pou war. Atann Kansréti inn ou dé mwa. Touléka, otour, ozalantour d’nou ni rosan pa in bès konsékan somaz.
Pou la rényon i anons plito in os. Déza nou lé déza or norm anndan la, ala i kontinié goumanté. Konm kréol i di lo pis i tonb touzour si shyin mèg. Sépousa mi di, pou nou i fo in trètman somaz par koté, in trètman éspésyal, vik nou sitiasyon lé éspésyal. Si tou lé zan i anons a nou in bès in pour san, dann konbyin d’tan nora pi somaz ? Mi krwa pi tro bann zanons, pou bana, in manièr anblouz a nou.