Dimansh o swar si lé zabor 20 h 30 local, 18h30 déor lavé in lémisyon d’si in shènn piblik, konm anndan té i koz in pé lèr lib, mwin la rosenti tousala konm in lèr d’vérité. Lo promié socrétèr di parti sosyalis té an promièr pou pass an rovi laktialité, pou donn son lavi d’si la politik méné, d’si lo dogré d’sékirité anndan lo péi, d’si la lwa El-konmri, é patati é patata. Ek lo lanimatris lavé inn dé zinvité, inn pou koz d’si la sékirité lot ankor d’si sondaz épisa in madam pou koz dsi la politik.

Baya, i ariv lo tour la madam. Mi ésplik pa zot dann kèl tramay li la mèt lo boug. Lo madam la komans drèss lo bor. Ala in gouvernman swa dizan de gosh, la ramass mantèr èk nou dopi lo débi minm, dopi lo diskour du bourgé, lo zour la dizon té Jaurès té i koz, la donn tout larzan bann patron, la zordi zot i kass lo kod du travay. Nout famy sé in famy d’moun la touzour vot pou lo parti sosyalis dopi 50 an, pou nou lé fini kont pi si nou ni vot pi. Daborinn nou la finn déshir nout kart.

Lo madam i rakont ankor, èl na konésans in moun, li osi socrétèt son séksyon i oz minm pi fann trak, èl lé fatigué antann di “zot la trayi a nou“. Fransh vérité promié fwa dopi 2012 mi antan, in lèr grann ékout konm sa, mi antan in moun lash a li konm sa d’si lo gouvérnman. Koman lo madam la anmansh a li ? Lo promié sécrétèr té abyé pou livèr. Fin d’kont, lo madam la di konm sa. Ni konsidèr pi konm in mansonj sak lariv a nou, ni konsidèr konm in traizon !