Oté

In manyèr fé kroir d’moun po d’shanm pou pla kouvèr, makaroni pou la bouzi !

Justin / 18 févrié 2019

JPEG - 43.6 ko

Somenn pasé La Frans la mète 64 zémigran klandestin dann in l’aviyon Er Ostral épi la fé rotourn azot dann zot péi Srilanka pars d’apré sak i di dann zournal zot la pa nyabou done in bon lésplikasyon dovan tribinal sirtou zot la pa nyabou asplik pou kosa, an kosa, zot lété dann danzé si zot té i rotourn dann z’ot péi.

Ou i diré kaziman bana sé in bann tète bloké : zot lété bien dann zot l’androi, épi l’avé poinn rézon pou sov z’ot péi. Lé kant mèm bizar de moun i sort z’ot péi, pou alé dann in n’ot zot i koné mèm pa épi zot noré poinn rézon pou fé sak zot la fé… Toulmoun, d’apré sak moin la antann, i aksèp banna la fé konm k’i diré in l’akt gratuit é final de kont pou in bonpé in l’akt manké, par in bann moun la tète lé piké.

Final de kont : kisa i pé ète zalou nout sityasion ? Sirman sak i pé z’ète asuré in bon travaye isi, in bon mézon, in vi bien korèk mé bann srilanka i fé pa parti so bann moun-la. An touléka, mi oi pa pou kosa demoun i pé kite z’ot péi épi instal azot isi si zot i koné i sa pass azot la shène dann poigné. Si zot i koné i sava mète azot déor épi si la loi zot péi i pé kondane azot pou fé la prizon.

Si mi konpran bien sak moin la lir i parétré inn-dé pasér, volèr larzan, ramasèr mantèr la fé kroir azot isi lété in péi d’kokagn. Alé oir té pa vré é si i pé roul azot konmsa dann la farine lo lémigrasyon klandèstin la pa paré d’arété. I pé pa fé gob amoin in n’afèr konmsa : néna in grav késtyon, sa lé sir é lo l’informasyon i pass si tèlman bien isi épi laba ké léskapad banna i spass konm li la spassé é nou rényoné nou la kroir ninport de koi. Kaziman fé prann banna épi nou mèm po d’shanm pou pla kouvèr, makaroni pou la bouzi.