Zordi mi sava anparl azot kékshoz la pa spass isi La Rényon, mé la spass laba shé nout bann sèr é frèr La Martinik. Mi pans zot i koné déza, pars in pé la fine pète in kab par raport zafèr-la. Kosa mi vé anparl azot moin la ?

Mi vé anparlazot in l’afish banna-la proféktir mi pans-la tiré dann La Martinik. In l’afish pou sak i apèl bann zèst baryèr é la distans i fo réspékté si ou lé an parmi in bonpé d’moun. In mète ! Sa zot i koné afors banna i rabash anou sa dann tout médya..in mète lé bon, toulmoun i koné, é la pa bézoin bak+ 23 pou konprann. Mé oila, pou fèr pli klèr-sansa pétète pou fé ri la boush - la mark in mète sansa sink zanana avèk lo désin é tout.

Sanm pou moin, si isi i fé in n’afèr konmsa demoun lé riskab pa z’ète kontan, si par ébzanp i di : in mète=sink fouyapin… Romark si l’avé fé in zafish konmsa laba dann la Frans é si l’avé mète : in mète= sink bétrav a suk, sansa in mète= sink bèl grap rézin, moin lé pa sir bann fransé nora aprésyé l’umour-la suivan son zist valèr.
Astèr ni pé fé ankor dé romark : promyèrman bann néokolonizé konm nou i pans souvan bann moun i sort déor na pou l’abitid, rantre zot, gaskone anou. Dézyèm romark : nou bann néokolonizé ni pans sèryèzman néna désèrtènn désizyon ni pé prann par nou mèm, é nou lé anpéshé - ni pans souvan dé foi é sa lé vré - ni pé fé myé par nou mèm ké sak ladministrasyon inporté i fé par raport bann problèm i konsèrn anou.

Rézilta : sanm pou moin, in mové klima i instal sir plas é kan ni pran la moush sé pars néna tout in réalité i bote pa nou ditou é dopi lontan. Dizon lo morso vizib dann in aÏsberg.