Disi détraw mwa, Moris (Maurice) nora son Métro-Express. In morso 26 km kont lanboutéyaz, mé osi pou dévlop lo péy. Lo Minis transpor Morisyin lé fyér konm pa kan li di : « Dépi 1990, sé in rèv Métro. Nou vizion, sé fér an sort lo Sud, lo Nor, l’Ouest ék l’Est vinn aksésib avék Métro… ». Moris, 1865 km2, lé bonpé pli mizing k’la Rényon, 2512 Km2.

Alor foutor, pou koué sak lé posib la-ba, d’si innti zing kayou tousél, lé pa fézab isi, dann in départman la Frans, swadizan ? Mantér, té pa larzan té i mank, mé la pran nou pou kouyon. Konsékans, zordi la Rényion i viv pi ék lanboutéyaz partou, tout komine lé paralizé, lékonomi i pran lo shok, la popilasyon antyé i pay lo po kasé. I an pé pi. Mé ni zoué kanét minm.

An 2010, pou antèr lo prozé Tram-train Paul Vergès lavé mét d’si lo ray, l’UMP ék Virapoullé - Didier Robert an tèt, la fé kroir Rényoné blan pou nwar, la rakont a nou in takon zistwar, in shaplé d’konnri, bonpé la gobé. La fé aval la popilasyion, k’lo prozé Tram-train la, té pa pou la Rényion, mé sa té zis pou lo plézir Présidan Vergès. La di ankor, sa lé tro shèr, va mét la Rényon oki, nou va pay in ta zinpo pandan sinkantan ! Episa patati-patata. Sériz si lo gato, la razouté, myé vo démil bis, pou règ lo problèm zanboutéyaz la Rényon.kit ta mèr, va ! Gét aster ousa ni lé.

Daborèn, na pwin personn la pa vi la koulèr lo dé mil bis ! Epi mon kamarad, fransh vérité, kan ou vé sov in moun paralizé dann son li, ou donn pa li larsénik pou bwar ! In marmay lékol i konpran sa.
O final, pou bar la ont, pou ésay ésplik zot kouyonis, lo bann la tyé lo tram-train Paul Vergès, i propoz a nou astèr in monoray. Mé Kan kok nora lo dan.

Pol