Oté

In milyar larzan, an lèspas lo tan in kou d’pèt !

Pol / 20 avril 2019

JPEG - 43.6 ko

Plik i sava, plik nout sosyété i dovyin konpliké, arpi ryin konprann. Si nou réfléshi byin, sépa sélman lo klima la fine détraké. Zégzanp i an mank pa. Ma donn a zot inn.

Nouvé, nouvé pa, nou kroi bondyé ou nou kroi pa, dofé dann kadédral laba Paris, sét’in katastrof. Sét’in arash kér war in zafèr konmsa. Mi sarpa rakont, isi, lo déroulé lo zévénman. Nout tout la vi sa dann télé. Mé foutor, kosa i vé dir so maraton pou konténèr larzan in ponyé bondyé la tèr ? Sé koué so zanshèr la ? Poukoué mét la tiray, dézord dann kér d’moun ? Poukoué fé pèt tangaz, konm sik ék tousak nou néna, nou lavé pwin asé ankor ? Mé kisa lotèr ?

I fini pi di anou, i fini pi répété, larzan napwin - minm pa in shikét – pou travayèr, pou lozman, pou vyé moun, pou abat la mizèr bann lé dann gran lokisité… Etc. Mi razout pa katastof dann désertin péi ousa néna la famine akoz la gér ou sansa tsunami, i sora tro long. Alor, lé toutafé lozik lo moun i konpran pa koman, oté, dofé té pokor tinn dann katédral, té fine trouv in milyar larzan pou domin armèt ali dobout konm i fo. In milyar, an léspas innti linstan, talèr pli rapid lo tan in kou d’pèt ! Koman apré, zot i vé, lo moun i gob sa, é zot lé pa an shalèr ? Arèt siouplé pran lo pép pou po d’zèf.

Minm lo moun larm lo zyé la koulé, minm sak i kroi for bondyé légliz, min sak lé dakor pouk i armont in not zoli katédral, i rofiz aval in zafèr konmsa. Astèr, sak la rodé, aranz a zot pou ansort a zot. Mé Bondyé Ségnir, so lépok-la, sé vréman in lépok arpi ryin konprann.

Pol