Médam zé Mésyé, la sosyété, kozé lé bon mé fèr lé méyèr. Avèk la min i pé fé bonpé zafèr, mé i fo mète lé dé ansanm souvan défoi. Bien sir in sèl min l’asé pou lans in gronad péi mé na poin sa solma dan la vi. Dann nout kozman i parl bate la min, aplodir. Dann d’ot i di in min i pé pa lav ali tousèl é in min i lav l’ot é sa sé in provèrb dsi la solidarité. Agard demoun apré travaye : in min néna in rol, l’ot min néna son rol. In min i ékri, l’ot i tienbo kayé. Bann péshèr I ansèrv lo dé min pou romont la lign. Pli pti lopérasyon si ni vé li lé fé an sékirité sé lo dé min ké d’moun i ansèrv. Sa i vé pa dir in min ni ariv paf é arien, mé avèk dë min, lé plis éfikas, plis an sékirité. Alé ! Mi kite azot rofléshi dsi kozman-la é ni artrouv pli d’van. Sipétadyé.