Moi d’mai, in ministr - son pti nom sé MAM - la déside fé in fishié. Pou fèr koué ? Pou mète déssi, tout bann moun lé riskab fé dézord in zour, épi mète danzé dan la sosiété. Donk, MAM i profit bann moun i sava pran vakans pou fé son mové kou akoz bann z’assosiasion épi bann sitoiyin la bien konpri té in mové kou kont la libèrté.
Alor, d’issi d’laba, demoun la komans bouzé, bate la lang, sign pétission, anvoy mésaz déssi intèrnèt, in pé la mèm di k’zot v’alé tribinal : konsèy d’état va zizé. Bien sir lo bann dirizan la droit, z’ot koté, la komans di zot i sanz ar pa arien sof si tribinal i déside épi si zot lé pa kontan zot n’a ka pran konstan, épi bate z’ot déyèr a-tèr si zot i vé.
Sof ké lo prézidan li-mèm la fini par di, i fo shanj manièr, arkomans par l’komansman épi diskité. Alor MAM i di èl va diskité, solman èl i fé sanblan épi èl i ar-ékri in n’ot dékré an misouk. Pa si tan tèlman, vik méssié Fillon i an apèrsoi épi i di lo MAM : mi lèss aou ziska yèr pou arfé in n’ot dékré !
La lé sérié mé lé sinp : si ou lé pa dakor avèk lo prézidan, soi ou arval out vomi épi ou i ékri sak lo boug i vé, soi ou i shap avèk la mass... In ministr sa i fèrm son boush sansa sa i démissione ! (1)

(1) Un ministre, ça ferme sa gueule, ou ça démissionne ! (Chevènement)

Justin