Na in kozman i di konmsa : la parol lé an or, lo silans lé an arzan é sanm pou moin zordi, dann nout sosyété, na plis larzan ké l’or. An tou lé ka, sak moin lé sir sé ké zordi i fo kontrol son parol. Kan ou i sava di in n’afèr, i vo myé bien mark dann out tète, sansa dann out min, sansa ankor dsi in bout papyé kosa ou i sava dir. Antansyon pa dépass sak ou i doi dir ! Pou kosa mi di sa ? Pars si ou i débord lo kad, asiréman ou lé riskab ète malèz. Koman koman, lé sir ou i sava di in n’afèr anplis é ou lé pou rogrété. Pé s’fèr ou va trouv aou konm in grin bébé dann panyé mayi ! Pé s’fèr ou i sava vèks demoun ! Pé s’fèr ankor ou i sava fé in malkontan ! Alé ! Mi lèss azot réfléshi la dsi é ni artrouv pli d’van sipétadyé.