Mézami alon rovni in pé dsu noute listoir : kan Paul Vergès la parti dann la klandèstinité pou évite fé arète ali pou soidizan in déli la prèss ké l’été pa in déli an franss, in pé la di Paul lé dann la klandèstinité é son bande zadvèrssèr-bande média anparmi-la di li lé parti an kaval.Alor suivan lo mo ou téi anploiye, soi ou lété dann kan Paul Vergè soi ou lété dann kan son bande zadvèrsèr, mèm lo kan ofissyèl.

Nou va rovni sirman dsi sète afèr-la, mé alon anparl kékshoz na poin lontan la éspassé : kan l’ariv le lopérassion wumbushu é ké plizyèr group jenn la sèye anpèsh détrui zot kaz an boi sou tol bande média ofisyèl la di zot lété in bande délinkan é bande poliss an fass lété bande fors de l’orde. Astèr si ni réfléshi in pé : ou lé délinkan pars wi resst dann in kaz dopi étan né é wi défande ali konte sak l’apré kass ali-la plipar d’tan san propoz aou épi oute famiye in mézon pou résté épi bande poliss i protèz bande zanzin d’shantyé l’apré kassé-brizé é wi apèl sa bande fors dé l’ord. Mé kèl l’orde sa ? Mi oi sa plito konm bande forss dézorde.

Mwin pèrsonèlman mi oi pa lé shoz konmsa é sirésèrtin mwin nora zamé anploye lo mèm mo vokabilèr : lo bande mo ofissyèl i tradui lo parti-pri bande média ofisyèl lé pou lo wumbushu donk pou lo kassaz bande mézon, épi pou mète déor bande moune na poin in sityassion régilyèr dsi lo poinn-vizé la politik lo gouvèrnman franssé.

Astèr alon parl lo banga : toulmoune i koné sa sé in l’abitassion tradissyonèl bande jenn dann mayotte, kan zot i sorte ladoléssans pou trape laz adult é kan in zoinalist i ékri la fine kass 250 banga-alé oir sé bande kaz bidonvil-mwin lé sirésèrtin bonpé maoré lé riskab d’ète vékssé par in l’atak konte zot kiltir épi zot sivilizassion. Mi oi sa konm in kozman rassist par rapor banna.

Astèr alon di dë pti mo dsu lo ton in lartik : si par ébzanpe wi anploiye in ton pozitif pou anparl la pozission méssyé Makron dsi la politik larzan dann lo monde antyé épi son sanzman possib, é si wi gnor lo zintanssion kashyété par son diskour- si wi oi pa sa konm in sinp déklarassyon pou bèrne bande viktime lo sistème larzan dsi lo plan mondyal ébin wi vé-wi vé pa, wi aporte delo dann son moulin alé oir lé pa sir ditou sak bande péi kapitalist va fé apré an avoir kass lo koin. Wi di pa mèm shoz kan ou lé a dékouvèr ké kan ou lé kouvèr.

A bon antandèr, salu !