Matant Zélida la ékrir Justin :

Mon shèr nové, mon spès salté, rouj de fon dovan l’éternité,

Kan zot i trouv pi kosa i fo ékri, sé l’èr k’zot i krétik l’Almagn, in péi tout bann péi l’Erop i vé ansèrv konm modèl. Li lé vanté pou son z’ésportasion. Li lé vanté pou son éstabilité dan son finans piblik. Pou son pti kantité shomèr, parl pi ! Moin lé sir, si la Frans lété dann in ka konm sa, mésié Hollande nora bat son poin dsi l’éstoma é tout bann moun la gosh nora fé lo fièr, nora fé lo for... In l’égzanp mi sort antann dann télé, mèm bann l’abatoir koshon l’Almagn i pé ansèrv konm modèl. I parétré, d’apré sak moin la antann, in bann péi i anvoy zot koshon dan l’abatoir l’Almagn pars la-ba i rovien pa shèr pou tié koshon, dékoup lo karkas, ramas lo san épi lo réstan. Alor, plito ké gaskone bann z’Alman, lé pli préférab alé aprann bien pik koshon. Tok ! Pran sa pou toi !

Justin la fé pou répons :

Mon vié matant k’i koz touzour la boush rouvèr,

Mi trouv bien sak ou i ékri amoin. Lé vré, bann z’Alman lé bon dan zot l’indistri, dan zot l’organizasion, é dann in bonpé z’afèr. Lé vré, zot rézilta dan l’ékonomi lé valab. Tousa lé vré, mé si i grat in pé lo dési, kosa i trouv an dosou ? Moin la fine di, la-ba, soi bann fam i travay, soi zot i fé z’anfan pars la poin la gard pti z’anfan konm k’i fo, l’arzan z’anfan lé in pé mèg, é si ou i vé gingn RSA, pardon matant, mé tout bann polis i pist aou, i avèy out kont la bank, i suiv out manièr viv. Dizon ou in moun dèrnié kalité. Ou in délinkan an puisans !

Ou i parl l’abatoir koshon dann nor l’Almagn, moin osi moin la antann parl de sa. Moin la vi dann télé in kantité travayèr apré okip so travay-la. Sa i tourn sis zour par somèn dizèr par zour. Bann travayèr i gingn in pti pé moins mil éro par èr d’tan pou in salèr troi éro é d’mi par èr d’tan, é pou i diré in travay soisant èr par somèn. Mi rakont pa ou la fatig banna lé d’dan, l’anbians l’abatoir koshon épi lo réstan. 

Ala lo modèl ! Sé sa zot i vé ? Mi pans pa bann Rénioné i vé in n’afèr konm sa. Tok ! Pran sa pou ou !

NB : Lé vré, in bann droit i domann siprime l’ésmik. Si i fé sa, bann salèr va dégréné é la sosiété va artourn an arièr.

Justin