Par kèl bout i fo prann so késtion-la, so léspès kass tèt shinoi. Par an-o, par an-ba, si lo koté... Moin lé d’avi, konm k’i diré pèrsone i koné pa, sansa i vé pa konète. Mi vé parl déssi la késtionn pri : nana in lobsèrvatoir bann pri, solman li la poin lo moiyin fé son travay konm k’i fo.

Alors, kèl marshandiz i fo fé bèss lo pri ? Mi di pétète, i fo okip lo pri manzé akoz pou in pé kréol, sa promié traka. Sansa, agard do pré lo pri loiyé, akoz in bon pé famiy i soufèr avèk lo pri loiyé kan lé égzazéré. Ou bien, alon rogard lo pri linz vik lo kréol i èm lo falbala.

Dann lèst la-ba, nana in boug la di : « Promié zafèr i fo gardé, sé lo pri médikaman ! » akoz sa lé tro shèr issi. Alors, si mi konpran bien, bèss médikaman épi nout pla va gonflé, nou va gingn in bon kaz épi nou va mète linz an nik ? Alé dormi don ! Pou kissa déssèrtin i pran anou : i kroi nou na la mote dann zié, ni oi pa klèr ?

Na in pé i distribié bonbon koko èk la mok an tol : zot i pans pa Virapoullé i mérité in mok an tol ? Dizon in mok in pé éspésial, avèk pétète la form in po d’shanm épi tout sak I sava avèk.

Justin