Mon kamarad Zanbas la di amoin in n’afèr, solon li, lé riskab fé gonf nout pla : la sienn épi la mienn.
Par koman d’apré zot ? A, marmay-la, la tèt i travay in bon pé ! Mi domann amoin solman pou kossa, li ansèrv ankor poto pou la boutik Zan-pier dépi gran matin ziska lo soir, sèt zour déssi sèt. Daoir la li na la shias !
Donkalor li di amoin konm de koi, l’anpe épi l’assédic i sar assosié, pou ète in sèl sosiété. Kan i fé sa, d’apré li, i fo trouv in nom pou donn lo sosiété épi sak i trouv sa i gingn in bon moné... In bon moné, mi domann ali, kossa i vé dir ? Li réponn amoin k’in bonpé sé in sonm konsékan...
Li kalkil in kou épi li di amoin, i fo pa fé dézord kan li l’apré kalkilé. I parétré, si i fé dézord, son matièr griz i mète a bouyir, é i transform an siro la kuite, é lé pa bon pou li. Tou d’in kou, son zié i klèr épi li di, fièr konm Rataban, ala lo nom moin la trouvé : "Po lanploi". Lé gayar non ?
Ala pa k’son pti radio, i anons k’ in sosiété la-ba dan la France, la fine trouv lo nom. Èl l’apèl sa... parèy lo nom Zanbas la trouvé... mé i ékri pa parèy : la sienn sé "Pole Emploi". É pou sa, l’ État la pèy "135.000 euros" : in moné konsékan pou vréman, mé pa pou nout dé li, malérèzman !

Justin