Ni pé dir li lé inportan par lo tan li la diré épi pars pandann tan-la néna in gran pèryode sé langajism indien é pandann tan-la la bonpé zansète indien l’arivé. Néna galman langajism afrikin,malgash, chinoi, épi bann l’azi di sidést san konté dsi la fin langajism rodrigué. Sé dir si la pèryode zangazé lé inportan pou la divèrssité noute pèpléman é final de konte pou la divèrsité noute kiltir.Mézami shak ané, kan i komémor bann zangazism, i pârl fèr in moniman é i azoute in moniman sar vizib dopi lo syèl, la tèr épi la mèr mé opliss mi antann parl de sa, opliss mi oi li fé konm la lign lorizon, li éloign ofiramézir .

Mi koné pa si néna in problèm dann sète afèr-la, antouléka sé in n’afèr k’i avanss pa pou linstan. Si mi di azot la trète avèk lésklavaz zot ossi na pwin zot moniman.Mi pé dir ossi noute popilassion na pwin son moniman avèk toute la divèrsité ké ni koné. Sa ossi sa i poz problèm : pou kossa la popilassion rényonèz dann son ansanm na poin in moniman pou roprézante aèl ? Pétète pars dopi bonpé d’zané nou la pass lo tan zoué louèkashète avèk noute lidantité-in zour sol ou kasyète la va fini par arété..Zot i kroi pa ?

Antouléka shak ané dopi vintan bann déssandan zangajé i rolanss zot réklamassion d’in moniman bien roprézantatif bann zangazé épi zot déssandan.Poitan ni san bien in moniman konmsa lé nésséssèr, konm bann moniman mwin la anparl an-o la.ni panss in moniman dsi lésklavaz épi la trète sé in n’afèr k’i fo anou-Zot i panss i fo lo problèm i miri ankor ?Mé koman li va mirir si ni anparl pa zamé sof in foi dan l’ané, ? Astèr lo ka la mcur ! Mor é antéré ? Mi kroi pa pars souvan défoi dann noute listoir, ni manke in lokazyon épi zapré ni ratrape ali dé foi in zénérassion apré, défoi dë zénérassion apré.

Anparlé sé fèr avanss lo problèm donk anparlé lé bien itil épi bien néssésèr.
A bon antandèr, salu !