Oté

« In moun i di li la vi, la pa konmsi sé ou, si i di li la tandi, lé ankor moin sir »

In kozman pou la rout

Justin / 19 séptanm 2020

JPEG - 43.6 ko

Médam zé Mésyé, la sosyété, lé difisil an avoir in témoignaz fiab pars lé dir si ou la vi raport vréman sak ou la vi, é si sé in n’ot la vi i fo komans par douté. Pli pir si li di li la tandi, pars la mi di pa ou kroi pa, mé antansyon ou i sava raport sa, ou lé kab rogrété. Souvan dé foi ou i antan dir : Moin la vi l’om ké la vi l’om, ké la vi l’ours. La i fo méfyé san pour san pars si ou i méfyé pa, ou lé riskab fé in kouyonad. Normalman dann la zistis i domann aou dë témoin pars inn i sifi pa. Si ou néna in témoin sé konmsi ou la poin arien, amoins ké néna dé shoz l’arivé lé konm in komansman d’ prèv. Alé ! Mi, kite azot rofléshi la dsi é ni artrouv pli d’van. Sipétadyé.