Médam zé Mésyé, la sosyété, koz èk moin sé koz èk in kouyon mé sé o pyé d’lo mir k’i oi lo vré mason. Mézami, dann lo moun i konpran aou, néna sak lé loin épi sak lé pré. Mé koman si li lé loin li pé konète aou épi sirtou konprann aou ? Koméla, néna in kantité moiyin pou konète in moun sansa konète in pèp. Dé pèrsone i pé viv kote-a-kote san konprann inn é l’ot, mé domoun loin i pé zète pré inn par raport a l’ot, pars zot i koné inn é l’ot, sirtou zot i konpran inn-a-l’ot. Ou i pé ète loin dann la zéografi, ou i pé ète loin dann tan, ou i pé ète prosh par la kiltir, par listoir, par la zéografi. L’internasyonalism i fé k’in rényoné i pé bien konète in shagosien, i pé fé galman k’in rényoné épi in palèstinien i koné azot bien épi i konpran azot. Aprésa ou i pé konète aou bien pars ou la konète lo mèm malèr, lo mèm doulèr, lo mèm bonèr, lo mèm gou, lo mèm lodèr.. Alé ! Mi kite azot rofléshi la dsi, é ni artrouv pli d’van. Sipétadyé.