Oté

« In moun i koz pa ou i pé done ali in brové l’intélizans, si li koz sé solon ! »

In kozman pou la rout

Justin / 17 out 2018

JPEG - 43.6 ko

Mi rapèl in famiy, zordi la fine pass l’ot koté, ébin an parmi, moun-la téi koz près pa ditou. Désèrtin téi pans li l’avé in gran kapasité pars son figir téi réspir lintélizans. Mé pou kosa li téi koz pa konmsa ? Pèrsone i koné pa ozis. Dizon li té in réfijyé d’lintèryèr. L’avé in n’ot téi koz toultan é sak li téi di lété i kass pa touzour lo kate pate in kanar. Pars mi koné pa si zot i pans konm moin mé kan ou lé an parmi néna touzour inn kisoi lo sizé d’konvèrsasyon, li néna konm in pé d’avans dsi lé z’ot. Donk sak ou i risk si ou i koz an poin d’ésklamasyon, plito k’an poin d’intérogasyon, sé atrap la démanti an passan é sa la pa toultan in bon afèr. Alé ! Mi kite azot rofléshi la dsi é ni artrouv pli d’van. Sipétadyé !