Sa lé bien gouté sa é moin ké la parti vol patat bouy dann manzé koshon zamé mi krash arpa dsi patat avèk la po. Solman sak i krétik sé pars zot i pans la po patat sa la poinn valèr.I di pa : « travay pou la po patat ? » donk pou rien. Alon arvir dsi nout kozman : si in moun i manz patat avèk la po pou in pé sé in moun pov vi k’li manz la po. Sé in moun li koné pa viv, vi k’li tir pa la po. Konm in pé té i di : « La bas klas ! ». Mondyé ségnèr mi éspèr zot i lir ar pa sa ! Pou Armand dann son diksyonèr, in moun konmsa sé in krétin. Lé ga zot i koné zordi bann médsin i di manz patat plito ké ponm-tèr épi manz patat avèk la po. Donk sak téi fé sa té an avans dsi z’ot tan.I fo kroir !

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir, ké rant-rant, ni pé z’ète, tazantan dakor rantre nou.