Oté

« In moun i oi pa lo zyé i bite dsi in mir épi li di, lo mond i arète tèr- la »

In kozman pou la rout

Justin / 1 désanm 2020


Mézami mi pé dir azot mi yèm pa provèrb-la. Pou kossa mi di sa ? Pars d’apré sak mi koné bann zavèg si zot i oi pa sa lé vré, mé lé zot sans zot néna lé tazantan pi dévlopé ké lé n’ot. Mé akoz alor mi mark sa an-o la ? Pars tout provèrb konm mi di souvan, néna in sans prop épi in sans figuiré. Sans prop lé pa in kassaz lé kui sansa néna in n’ot afèr pou konprann déyèr sa ?Mi pans néna : lé pa konpliké pou konète i sifi d’ in kou d’zyé dossi pou lir é pou konprann. Mé konprann kossa ? Konprann par ébzanp an parmi nou néna demoun i oi pa pli loin ké zot boutt né, défoi demoun nana dis sir dis dé koté d’zyé konm vizyon zot i oi pa pli loin é zot lé limité épi zot konésans lo mond lé limité galman. La pa bézoin ète avèg pou ète konmmsa . konbien i konpran pa plisské sak néna zis dann zot zalantour kisoi dann la zéografi, kisoi dann listoir, kisoi ankor dann sak zot i rossan ,zot shan lé pa pli gran ké sak mi di azot... Alé ! mi invite azot pou rofléshi la dsi é ni artrouv pli d’van . Sipétadyé !