Kozman-la, a s’ki paré, sé in kozman shinoi. Pou konprann ali, la pa bézoin ou na bak plis vinn-sink. La pa bézoin non pli ou lé intélizan plis i anfo. Mé mi konpran ali konm in miz an gard. Pou kosa ? Pars si ou néna konfyans dann l’intélizans in moun ou va donn ali out konfyans san pou san é toultan. Si ou i trouv, momandoné, néna kékshoz k’i klosh pa, ou va pans sé ou k’lé dan l’érèr. Sa sé in n’afèr i ariv pli souvan k’ ni kroi, é sa i konsèrn in bonpé d’moun . Na poin lontan moin té apré pans Bonaparte-Napoléon promyé si zot i vé !-, in boug sipèr intélizan dann son stratéji, konm dann son taktik ; li l’avé obli in sèl z’afèr : an avoir rézon in tan, i vé pa dir ou néna rézon pou toultan. Alé ! Mi kite azot rofléshi la dsi é ni artrouv pli d’van. Sipétadyé !