Mésyé, Médam, la sosyété, koz avèk moin sé koz avèk in kouyon-sé o pyé d’lo mir k’i oi lo mason, kisa la pankor antann in kozman konmsa sirtou si étan pti li téi sava souvan la kaz son gran-mèr. An touléka la myène-sète moin la koni-lété konm in l’anj késtyonn pasyans mé tazantan konm nou lété nonbré épi nou téi bouz in bonpé té i ariv èl té i di anou kozman moin la mark an-o la. Akoz lé kabri ? Pars li néna plis vitamine dodan ? Pars li sé in z’animo nèrvé ? Pétète in pé tousala pars si ou i rogard i bèf-in vash- li pass son tan a mashé, mashé, bavé, bavé, kant la tète, bayé, zète son koté koté gosh sansa koté droit pou faroush lo moush… Touzis si i di pa Éya ! Konm in vyé moun aiz kan i lèv ! Mé kabri Baya, sa lé rapid, sa lé vif sa lé nèrvé donk demoun i pans sé par lo lé li la tété é i mazine si in marmaye la tète dolé kabri la pa li pou ète kalm konm i di. Alé ! Mi kite azot rofléshi la dsi é ni artrouv pli d’van. Sipétadyé !