Oté

In moun san kiltir sé konm in zèb san réyire !

In kozman pou la route

Justin / 12 avril 2021

JPEG - 43.6 ko

Médame zé Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami, néna lontan mi koné kozman-la-in kozman bann saz l’afrike - mé la pa arienk in foi, mi domand dann mon kèr kossa sa I vé dire pou vréman. La pa toute anparl in kozman si wi konpran pa kossa li vé dir pou vréman, mé zordi, sanm pou mwin, mi gingn donn ali in sanss, in signifikassyon. Si lo saz i di sa, sa i vé dire si sé in zèb san réyire, la pa in zèbr ditou-sé in n’ot zanimo mé sirman pa in zèb é parèye in moun san kiltire la pa in moun ditou. An atandan, in sinp kozman konmsa i amontr anou koman la kiltire lé inportan pou bann vyé saz l’afrik : zot kiltire sé zote pèrsonalité, zot kiltir sé in n’afèr k’i transmète zénérasyon an zénérasyon – in zour mwin la antann dir bann zansien sé bann passèr d’mémoire é sé pou sa demoun i répèkte azot tan é tan dann bann péi l’afrik laba. Alé ! Mi kite azot rofléshi la dsi é ni artrouv pli d’van. Sipétadyé.