Médam zé Méssyé, la sossyéét, koz èk mwin sé koz èk in kouyon, mé sé o pyé d’lo mir k’i oi lo masson.

Mézami, dan la vi wi trouv demoune néna gran zanbission, néna sak néna in l’anbission normal, é sak na poin l’anbissyon ditou. Mé l’éssanssyèl d’apré mwin sé ké sa i korèsponde avèk oute kapassité.

Astèr néna dé shoz lé possib fèr épi dé shoz lé pa possib . Alé pa rode dékrosh la line avèk lo dan pars lé sir wi gingn ar pa. Konm alé pa boush lo trou volkan : normalman sa sé in n’afèr demoune normal i gingn pa fé.

Sof ké zordi l’imanité i rode l’inpossib, i vé fé dé shoz sirimène. Ankor k’avèk l’om modèrn ni koné pa oussa li v’arivé. Pé s’fèr li va détrui li mèm la rass imène é l’èrla li sar bien avanssé.

Alé ! Mi kite azot rofléshi la dsi é ni artrouv pli d’van, sipétadyé.