Mézami néna plizyèr fasson dir in moune lé mor. Lé pa touzour réspéktyé, mé lavantaz sé ké wi konpran sak i vé dir. Kan i di in moune l’aval son kiyèr, lé klèr é nète, li ansèrv ar pi kiyèr-la donk sé la fin pou li. Si mi di l’aval son fourshète lé parèye ossi : wala in fourschète i sèrv ar pi pèrsone, mèm son propriyétèr.

Défoi wi antan galman demoune l’aval zot biltin d’néssans… Koméla néna in kozman mi apréssyé pars li lé élégan : sé kan wi di in moune la fine pass l’ote koté la vi. Sa i vé dir noré dë koté in koté ou lé vivan épi in koté ou lé pi vivan mé sa so dézyèm koté, sa wi koné pa oziss si néna inn oziss.

Alé ! Mi arète avèk sa pars zot i koné bien, toulmoune la in pé pèr kan l’èr i ariv pou pass l’ote koté é kossa néna l’ote koté ? Mi done ma lang lo sha mé lé pa sir lo pov sha i vé. Mi kite azot rofléshi la dsi si zot i vé é si zot i vé pa, lèss tonbé é ni retrouv pli dvan, sipétadyé.

Justin