Mézami zot i koné dsi la tèr, dann ninporte ékèl péi, néna demoune lo karaktèr lé pa parèye : in pé lé rapide, d’ot lé dousman-dousman, in pé lé normal pou la sossyété.

An parmi bann zanimo lé parèye : néna sak lé rapide épi sak lé dousman-dousman.Kabri lé rapide, li sote partou-partou é si li lé larg mi pé dir azot pou trape ali la pa in n’afèr fassil.

Sé pou sa pétète le moune i panss si i done lo lé shèv zot zanfan li va grandi vite épi li nora in karaktèr dinamik-pa tro mé in pé lé bon kant mèm. An atandan, li pé z’ète iper aktif é la traka pou lo paran. Dann noute kozman popilèr in moune i bouz-bouz in bonpé sirtou si sé in marmaye i di kozman mwin la marke an-o la.

Mi doute pa ké dann zot frékantassion néna demoune konmsa é tazantan zoti di dir dann zot mèm. "Mé arète bouzé foutor ! I gingn pa rèst in pé trankil ?"

Alé ! Ni artrouv pli dvan, sipétadyé.