Momandoné l’avé in plantèr dan la sal é plantèr-la la domann la parol.Li lété assé azé pou konète la kiltir yèr, épi sète koméla.Alor li la di bann jenn-la : « In tan issi La Rényon dann tan plantèr téi sèrv ni langré, ni produi shimik, ni dézèrban.Dann tan-la lo rannman lété pa tro bon, fimyé té lo sèl fèrtilizan, zinsèkt téi débrouye azot pou viv lé z ‘inn avèk lé z’ot, é bann zèrb zot ossi zot téi ansèrv lékilibraz la tèr.

Aprésa kossa l’arivé ? Bann zinportatèr la fé vnir langré, produi shimik, inséktisside, dézèrban é toute sorte de shoz téi pèrmète in bon rannman, in bone protékssion konte shanpignon épi zinsèkt, mé opliss téii sava,opliss téi fo goumante la doz ziska lo sol épi la natir i apovri pou vréman. Si tèlman ké lo sèl sol demoune téi akssèpe té lo sol mor é inpossib pou rodone ali favèr.

Donk lo lintervanssion plantèr-la la kloute la boush déssèrtin é la lèss la plipar d’moune san parol dovan lo dézass ni koné koméla é dovan noute inkapassité kiltiv san poizon.

Pou kossa mi di késhoz toulmoune i koné ?Sé pars bann dépité épi bann sénatèr i sorte vote in loi i apèl loi duplomb é loi-la sé in bon loi pou bann rish, konte la natir, konte bann zabèye é ni rosava dann diirèkssion in déstrikssion la natir ankor pli gran san oir sak i sava ariv pli dvan. Ni sa kongn noute tète konte in mir é bonpé i rann pa zot konte é nou rényoné ni pé pa fé arien.

A bon antandèr salu !