La rout tamarin i sava déssi la finission. Shantié Tram-train la pankor komanssé. La rout an kornish sar pou apré. Sa lé prévi konmsa épi si i niabou fèr lé bèl. Lé bèl pou bann lantropriz, pou bann travayèr, z’ot famiy épi z’ot bann dalon i travay pa déssi shantié mé dan lé z’alantour...
Pou aspèr bann gran shantié, pou pa k’bann travayèr lé dann traka shomaz, pou k’bann lantropriz i mète pa la klé déssou la port, bann Résponsab (avèk in gran R) la prévi nora in bann moiyin shantié, bien néssésèr, bien itil pou dmoun épi pou donn travay... Tout téi doi roul a pépré ron !
Sof ké in pé, san agard ni dovan ni déyèr, san agard ki k’i pèrd ki k’i gingn, pars bann zéléktèr la vote pou zot la désid kal lo bann projé : kontournaz Tampon, Zénit, la plaz avèk lo por Sinni, lo pol oséan, étsétéra-étsétéra la ké lo ra...
Mé san farsé, so bann moun-la, mi domann amoin si zot la kalkil toussa déga zot i sava fé, pli pir k’in siklone dann nout lékonomi é dan nout sosiété. Alors, mi domann amoin si tazantan... tazantan solman... na poin in mové rèv i vien kass somèy bann kassèr lékonomi.

Justin