Sa i tonb bien vi k’in bonpé péi lété an mank. Donk zot va dir amwin : « Si i fé sa a-suiv, ala in bon nouvèl pou l’imanité ! » Sirtou ké dann Likrène konm dan la Rissi néna par milyon léktar bone tèr : i apèl sa loess é sa lé fèrtil vèye pa koman dsi in in gran lépèssèr.
Mé oila, antansyon, in bon nouvèl i pé z’ète in mové nouvèl. Pou kissa ? Pou toute bande plantèr, dann bonpé péi, la désside arkomanss plante zot séréal : kissoi mayi, kissoi lo blé, kissoi lo mil — lo gro épi lo pti — ziska pétète trape lotosifizans alimantèr.

Mézami sa i rapèl amwin in zistoir mwin la fine déza rakonté mé inn foi anpliss, la pa inn foi an tro. Listoir in méssyé Bègue i rèss Sint-Ann. Méssyé-la la désside lanss in l’opérassyon dori. Li la domande in bonpé plantèr kann, assossyé avèk li pou plante shakinn in karo dori :200 mète karé par plantèr pou zot konsomassyon prop.
Mé oila, alé konprande, lo pri dori la tonbé toudinkou, é in bonpé dalon la ronons kontinyé le lopérassion. La bèss lopri lo ri, in bon nouvèl ! In bon nouvèl oui, mé pa pou bande plantèr la désside plante dori.

I paré galman dsu la finission la guèr 39-45 bonpé plantèr l’avé arkomanss plante sak i fo pou zot manzé. Linportassion la komanssé é bande plantèr la rononssé. Mèm zot téi koné lo kozman : « Kan wi vide oute gard-manzé, dépèsh aou pou ranpli ali ! » Mé té pi néssèssèr… antouléka sé sak bonpé demoune la panssé.

Konm koi, in bon n’afèr i pé vni in mové zafèr é vèrsi-vèrsa. A bon ékoutèr —, salu !

Justin