Na in kamarad la, konm i di, transfèr in mésaz dsi mon téléfone sélilèr. Vréman in drol de mésaz, dizon in mésaz rasis san pour san. Kosa li téi di, li téi di konmsa, apré bann malgash mésyé X, ala lo bann komor mésyé Y...dann tousala, bann rényoné lé bien mal fouti.... Lo mèm kamarad la donn amoin inn-dé non désèrtin moun i domann a vot pou lo fron nasyonal, zot i di sa san ont épi san rogré. Moin té i pans zot té dmoun bien, bann rényoné té i défann nout bann valèr é oila sak mi aprann. La pa inn fars, ni inn mansonjri. Mi pans pa zot la tonm dann in pyèz é mi kroi pa in mové zéni l’informatik la fé dir azot dé shoz zot té i vé pa dir. mi site pa zot nom, mi promète amoin solman poz azot la késtyon si in zour ni bite ansanm ;

Mi koné pa si zot i èm foutbal, mé mi souvien lo tan ou dann désèrtènn zkip l’avé zouar malgash, komor, zouar morisien galman. sak mi koné sé ké zot la mète anlèr lo fotbal rényoné é kan zot téi mont dsi térin, kisoi dann l’atak, kisoi dann la défans, kisoi konm gardien lo boi, demoun té i bate la min pou zot é la plipar d’tan té i obli zot té pa rényoné. i obli zot té pa né rant dé touf jarniome, dann in karo kann, ou sinonsa avèk in sapate péshèr koray dsi zot pyé. donk té i sava pa rogardé si zot nonbri té antéré dann la tèr rényonèz, é té i anvé pa zot pou zot mank dé rényonèzté. Final de kont demoun l’avé rézon pars sak i domann in zouar foutbal sé zoé foutbal bien konm ki fo é fé gingn son lékip. Donk dann léspor demoun lété in pé moin boushé ké zordi dann la politik, ou sinonsa apiyé dsi lo mir la boutik .

Moin té i koné in gro blan, bien bien blan. Zordi li lé désédé mé avan ké li mor, in médsin la vni oir ali, in zénétisien konm i di. Lo savan la domann lo boug si li vé pa k’i travay dsi son l’orijine sirtou koté bann madam ;Lo moun la di oui, pars dann fon dé shoz kosa li l’avé pou an avoir pèr ? Donk lo médsin avèk son lékip la travay épi in zour lo travay la fini. L’èr pou dir ali sak la trouvé l’arivé. Kosa i sava dir ali ? I sava dir ali li dsan an lign droit fransoiz Chatelain l’aryèr-aryèr gran-mèr tout bann rényoné konm in pé idi ? Bin lo médsin la pa di ali sa, mé la di ali, li désannn an lign droit dopi Marie Tout, in l’ansèt malgash. Mi koné pa kosa lo boug la pans de sa, si li la pran sa an bien, sansa an mal mé mi vé dir ninport ékèl rényoné arète dir li lé pir blan, sansa pir malbar sansa ankor pir sosi, ou sinonsa pir sola...Nout fonn tas i manti pa, nou lé métisé dopi lorizine nout listoir é sé sa k’i fo pa obliyé, nout tout lé zanbrokalé.

Justin