Mi souvien, kan moin lété lékol, nout l’amontrèz lavé labitid partaz in pé lo bann ti korvé rant bann marmay sak té volontèr. L’avé konmsa korvé pou éfas tablo, korvé pou aroz flèr, korvé pou sonn la klosh, étsétéri-étsétéra-la ké lo ra. Bann marmay té i lèv lo doi, épi l’amontrèz té i shoizi rant lo bann doi lévé... plito solon la bone mine lo marmay k’i lèv son doi. Bon souvnir, souvnir dann tan ou lété marmay.

Pou kossa mi rakont sa ?
Pars moin na linprésyon koméla, pou zéléksyon, i kontinyé fé parèy dann bann parti politik la Frans : bann politik l’outre-mèr i lèv lo doi é bann gran-shèf blan i shoizi dann ta, suivan la bone mine lé z’in épi lé z’ot. Solman, nou lé pi marmay lékol é zéléksyon la pa in n’afèr marmay lékol, pars sa i angaz nout lavnir !

Dann tout parti i fé sa ! Dann tout parti ?
Non va ! L’Alyans l’outre-mèr la pa fé konmsa ! Sé bann parti l’outre-mèr la alyansé pou prézant z’ot kandida, an aplikan le prinsip l’Alyans : diskite èk tout, pou ariv in bon lakor, lo méyèr lakor possib pou bann péi loutre-mèr. Pars konmsa, kan zéléksyon sar fini, tout va mète ansanm pou in bon politik l’Europ dann l’outre-mèr.
Sa in n’afèr lé bon pou nou, in bon n’afèr i mérite anou !

Justin