Konm di lo kont : na prométèr é prométèr ! Na gran prométèr é ti donèr ! Na in pé i pans promès sé dète ! Mé pou in pé promès sé kozman anlèr... Sa lé vré dan la rolasyon rant famiy, sa lé vré galman dann travay, épi dann komèrs. Sa lé vré dann la politik bien souvan dé foi... mèm dann la gran politik. Pou kosa mi di sa ?

Pars zot i souvien bien nou la vot pou François Hollande pars li té i di désèrtin kozman téi ral anou in pé. Dabor mi souvien li té i di in fraz konm de koi, li èm pa bann rish. Kan li téi di sa, demoun téi kroi rant bann gran vaza épi bann ti-kolon li profèr bann ti kolon. Aprésa, li la di anou li sava trap in pé larzan dsi bann rish, sak li téi apèl la transh 75 pou san. Li la di osi li sava limit lo salèr bann gro patron pars na in pé i toush in montagn larzan. Arzout èk sa in ta propozisyon téi fé pans anou li sava pa amèn lo mèm politik ké Sarkozy. Nou té si tèlman kontan kroir in n’afèr konmsa ké nou téi i pans lo boug téi pans konm nou. Té près pou nou, nou la voté !

Mank de po lété pa ditou sak nou téi kroi : zot i souvien lo pti kou d’soisant-kinz pour san ? Zot la antandi dann télé, mésyé Holland la di li la bien aprésyé la politik réform bann zalman. Nou té i antann lo kontrèr dopi in bon koup de tan. Lo minis Lékonomi la di li ronons limit lo salèr bann patron, li éspèr banna nora la sazès limit sa par zot mèm... Kisa i pé kroir in n’afèr konmsa ? Pa nou an tou ka, pars in pé i pans toultan ké zot posh i débord pa li lé pa plin. Na ankor in bonpé d’zafèr pou dir, mé nou v’arète la lo shaplé.

Astèr ni koné kosa i atann anou. Si ni lès fèr lé possib i fé in lantèrmann promyé klas pou lo diskour Sin-Lui. Moin la di, si i lès gouvèrnman-la fèr. Pa lès fèr sé kosa ? Sé fèr in bon lantant rantre nou Rényoné, konmsa gouvèrnman i oi bann Rényoné lé dakor si lésansyèl, é lésansyèl sé d’anbèk dannn shomin dévlopman, shomin pou siprime la mizèr noir, donn travay sir plas bann Rényoné. Sré déza bien in n’afèr konmsa. Zot i pans pa ?

 Justin