Pou in kou, in gouvèrnman la fé in kékshoz bien pou bann z’anfan é pou bann famiy nana z’anfan, sak la poin papyé... Zot i koné, dann tan Sarko té i mèt banna dann sant rétansion, kaziman dan la prizon. Lété pa in bon n’afèr pou zot, sirtou kan i koné dan kèl kondisyon banna i viv la-dan... Gouvèrnman la gosh la trouv sa in n’afèr i fo pa fèr, li trouv mèm sa i fé l’èr konm in maltrétans dsi bann z’anfan (ali mèm i di sa !). Donk la désid mèt an rézidans sirvéyé bann z’anfan épi bann famiy nana z’anfan plito ké mèt azot dann sant rétansyon. Sa sé in n’afèr lé valab partou dsi lo téritoir nasyonal, é lo minis l’Intéryèr, Manuel Valls, la bat tanbour pou sa.

Partou ! Mé la, moin la koz in pé vite ! Pars na in l’androi, touléka, i aplik pa in n’afèr konmsa. La pa dsi téritoir métro, mé dann Mayotte. La pa pars demoun i néglij aplik so dékré-la, mé pars — sa lé marké dan lo dékré — minis l’Outre-mèr, li mèm, mésyé Lurel, la fé mark dann dékré so l’éksépsyon-la. Poitan, Mayotte la-ba, nana in kantité d’moun gouvèrnman la France la pa done papyé. Pir k’sa, na dmoun i pèrd la vi dan l’oséan dsi bann koisa-koisa... Moin té i pans, dopi la gosh la pran pouvoir, èl noré trouv in solisyon imanitèr pou so problèm-la. Mi pansé gouvèrnman la gosh noré trouv in tik-tak pou protèj la vi d’moun. Mé li la pankor trouvé... Pli pir, la désid pa aplik in solisyon in pé plis imèn pou bann z’anfan épi bann famiy komor.

Sé dir azot si moin lé désu pars pou moin, la gosh i port bann valèr moral, é dan lo ka mi sort di, la pa sa ditou. I fé l’èr, in z’anfan san papyé i sort Komor sré moin k’in san papyé ordinèr. Sa sé in n’afèr, moin pèrsonèl, mi aksèp pa.

NB : Moin la antann dann télé Mayotte, demoun apré protésté, mé zika zordi, minis l’Intèryèr é minis l’Outre-mèr la pa port la démanti.

Justin