Kan dan lané 1998, Konsèy réjional la komans anparl lotonomi dann lénèrji, konm dabitide, bann gaskonèr la pa manké, pars pou zot, si in lidé i sort pa déor, i sort pa la mètropol, sé pa in bon lidé. Épi, azoute èk sa, si sé bann politik rénioné i propoz in n’afèr konmsa, lé pa séryé, pa séryé ditou.

Mé le tan la passé é in zour la déside in date : 2025 : Lèrla gouvèrnman la Frans la déside son koté fé son plan — GERRI, li apèl — é touzour pou lotonomi dann lénèrji.
Alors lo bann gran grèk, sak i pans zot tousèl nana lo droi rouv la boush, zot ossi la di : ala in lidé k’lé pa kouyon ; épi lé shoz la avansé : shof-lo solèr la komans pous in pé partou, pano solèr la komans fé romark azot déssi bann toi, épi bann gran la roulète la drèss z’ot zoli silouète dann syèl nout péi. Aprésa, i antann, in pé partou, l’apré tèst bann nouvo kalité lénèrji. L’afèr té byin angazé. Mé pou kossa ?

Ni koné nana in bon pé rézon : la shèrté épi la rarté lo pétrol, lo réshofman klimatik, lo risk oir la otèr la mèr goumanté, la pèr la mèr i manz la tèr, la pèr gran-gran siklone i détrui a nou... I pé pa dir la pa in bann bon rézon. I pé pa dir, non pli, sak la konprann problèm-la avan lé zot l’avé poin in kapasité pou prévoir lé shoz…

Pou mon par, mi souète in n’afèr : sé k’i amènn anou pli vite, pli for, in pé pli loin dann shomin lo dévlopman. In n’afèr nou la pankor gingn fé ziska zordi...

Justin