Kisoi par bato, kisoi dann laviyon, ou kisoi par kamiyon, pou transport marshandiz, nana kèk-é-kèk mil kilo gaz karbonik i fane dann l’èr, é zot i mont in konsantrasyon pou sirshof lo klima, pou fé mont la tanpératir é transform lo bon l’èr an mové l’èr, in l’èr an kit ta mèr.

Dann in gran komèrs La Rényon, moin la trouv in thé. Li té i sort dann l’Inn.
Té i sort dann l’Inn ? Oui… kan la ramasé. Mé kan la mète an boit, li té fine ariv dan la Frans. Épi, konm moin la di azot, li té dann in komèrs La Rényon.

Lété pa myé fé vnir sa dépi l’Inn ziska shé nou ? Sansa plant ali, prépar ali, fé sèk ali, mète ali an boit isi… ?

Zot i parl amoin lo pri ? Mèm si té in pé pli shèr, lété préférab pou la natir. Donkalor, lé ga, alon planté La Rényon osi, épi alon défann nout prodiksyon.
Défann nout prodiksyon, sé défann la natir, défann lanvironeman. Mé sa i fo i di ! I fo pa ni lès in zoizo malèr sort sépa ousa, vnir dir anou : li va fé vni tout marshandiz dépi la Frans.

Lé ga, pran pa in n’arsouy pou in profète ! In koshon pou in shoval de kours !

Justin