Tou lé gran-matin d’la sominn, mi antan bon pé d’moun i téléfonn d’si radio Pérkal, pou laniversèr. Kél az ? Sé pou in nan déplis. Lo kozèr ou lo kozéz radio i fé pou répons, félisitasion ! An parmi bann i téléfonn, désertin i di, zot i dor pa lo soir, pangar zot i gingn pa la lign landmin bonèr, sinon sa zot lé malad. A sakinn son plézir, la vi koméla lé télman an kittamér.

Mé pou mon par, sé lo « in nan déplis » là, ki fé travay mon koko. Mi poz a moin lo kestion, kan in moun i fé in laniversèr, sé in nan déplis ou in nan démoin ? Mon kamarad i di a moin, ou la pou kass out tèt komsa mim, lo répons lé fasil. I sifik lo zour là, ou guèt out figir in glass, ou dann in ver d’lo, ou na tout’ suit lo répons.

Moin la konpri : sé in nan déplis pli vié an laz, mé sirtou, in lané démoin pou viv. Mé alor foutor, sé in fèt ou alor in tristès lantèrman ? Dopi kan domoun i fé la fèt, kan li koné li na in nan démoin pou viv ? Finalman, mi konpran touzour pa.

Zot i mazinn in pé, koman i soré komik in moun ki téléfonn radio Pérkal pou di, « sé pou in laniversèr, in nan démoin », é lot ki féré pou répons, félisitaion ! Mon Dié Sénir, ou i antann zafèr dann so radio-la !.

NB I paré kan demoun i ko konmsa sé par kokètri, konm pu dégiz son l’az sansa pou pa fé konm toulmoun, mé afors fé dantèl konmsa, boudikont tout i fé parèy é sak lété in l’orizinalité, i vien firamézir inn banalité.