Mé zami, mon bande dalon, mi koné pa si yèr zot la garde in pé la télé lil Morris ; Si zot la gardé zot la sirman trande azot konte néna in n’afèr lé pa ordinèr l’ariv laba : sé yèr boudikonte lo nano satellite morissien lété lanssé dann léspass : in gran pa pou la nassion morissien, in gran a dann lo monde la téknolozi léspass. Lé vré néna pa mal de péi néna satellite dan léspass mé dann noute réjyon, sof si mi tronpe, néna arienk Morris la nyabou fèr in n’afèr konmsa.

Bande morissien lé kontan, lé fyèr. Ala sak i pé lire dann in zoinal i apèl Defi-media :

« Astèr in pti boute Morris i tourn dann léspass par dsi noute tète. Lo péi néna son dispozissionson prop in nano-satélite, lo Mir-Sat1. Lo Mir sat 1 lété plassé an orbite mardi lo 22 zyin 2021 dopi léstassyon éspassyal (ISS). Li ava anvoye bande zindikassyon Moriss la bézoin pou son lanvironeman, son lagrikiltir, épi dsi son Zone ékonomik i partien ali (exclusive en français). Projé morissien-la sé lo travaye Mauritius Research and innovasion é la koute 22 milyon roupie.. »

Biensir mi sava pa dire azot toute sak i fé laba Moris lé ékstra, mé ni pé pa pass sou silans in pèrformanss konmsa-sirtou ké la pa la promyère foi noute voizine i fé in lésploi konmsa-é si ni ékoute bien gouvèrnman Moris, sa pa pa in nafère i sava arète konmsa mé sré in pa an avan dann la téknolozi modèrn é pou sa la jénéèss i sava ète ankourajé assiz a tab lo progré syantifik pou rante dann la voi syantifik pou son zétide é apréssa pou son bande projé.

Rogré, mézami va vnir apré, mé zot i pé déza konète mon panssé si zot i lire mon kozman in pé souvan. Pou zordi ni doi félissite noute bande voizin é si possib marsh avèk li dann shomin la modèrnité.

NB Mon rogré sé ké la koopérassyon internasyonale noute bande zil lé si tèlman pa dévlopé. Toussèl i sava vite, lé vré, mé ansanb ni pé alé pli for é pli loin.