Mi sort antann dann télé prézidan La Frans la romanyé gouvèrnman .Li la nonm in gouvèrnman roséré avèk de moun jenn, konpétan . Astèr lo kèr bann gronouy i sava dann tout télé pou répète la mèm shoz :jenn épi konpétan, konpétan é pi jenn.Jenn mi koné kosa i lé, moin osi té jenn néna in bon koup de tan, mé konpétan !Kosa sa i vé dir ?Kon pétan pou ki, pou koué, pou fé kosa ?

Konpétan, mi pans sa i védir « bien kapab » mé bien kapab pou ki, pou koué, pou fé kosa.Pou ki :sa i vé dir sirman pou lo roi gronouy la mète azot la.Pou koué : sirman pars zot i partaz lo mèm zidé ké lo roi gronouy .Pou fé kosa :sirman pou amenn la politik lo roi gronouy la invanté..

Inn foi moin la di sa, mi poz amoin késtyon dsi sak i apèl la konpétans.Pou bann ti kolon, kosa i pé z’ète la konpétans ?In pé va di, sirman, pou fé donn travaye mon zanfan.D’ot lé riskab dir : pou amenn lo péi dann in shomin pasifik .D’ot ankor va pans sé pou mète an plas in politik santé éfikas, sansa in bon politik lojman sansa ankor pou bien konbate lo dérègloman klimatik épi tout sak demoun sansé i domann, i réklam é do plis an plis.

In késtyon kant mèm :zot i kroi pou tout so bann jenn épi konpétan, bann sizé moin la mark an-o la ,sa i intérèss vréman lo bann gouvèrnman.Sansa banna i pans sak bann ti kolon i réklam la pa bann sizé inportan pou vréman...Bann milyardèr, lé riskab dir, in politik i amenn ankor plis dé milyar dann z’ot kofor, ala in bon politik !Tanka lo bann jenn épi konpétan, i pé maziné, in bon politik sé sak i fé rant azot dann l’aparèye d’éta é si posib par an-o.

Astèr bann rotrété ratiboizé kosa i lé pou zot in bon politik ?Sé in politik i arète ratiboiz azot.In antikolonyalis, pou li, kosa i lé in bon politik ?Sé d’amenn in politik pou bate atèr lo kolonyalism.Astèr ankor in jenn na poin travaye, kosa i lé pou li in bon politik ?Sète va donn ali in bon travaye.In linjényèr avèk plin kapasité, kosa i lé pou li in bon politik ?Sirman in politik pou amenn lékonomi lo péi dann la limyèr é oir lo progré avans partou mèm si sa i raport pa in bann milyar.

Ni pé kontinyé konmsa san trouv in poinn rankont rant Macron épi tout sak i vé oir in klarté pou zot lavnir, in solisyon pou sak néna problèm, in marsh an avan pou tout sak lé an aryèr...Si lété sa la konpétans demoun i vé pétète ni pouré dir-san fash pèrsone- gouvèrnman-la li lé konpétan mé la pa dann shomin-la li marsh pou fé son shomin.

Ni pé domandé : mé Koman li ral sa ?Konm ni oi dopi dé zané é dé zané,pa pir mé pa myé asiréman.a, sharète shaviré souvan dé foi.