Mon shèr nové, toultan mi di aou lo pti bononm k’i gouvèrn la Frans-la va bouzé pou nou. Aou, éspès mékréan, mi oi ou na ankor doutans. Bon ! Ala in nouvèl, pran ali konm l’arivé, k’i sar done aou mal kadik : Figuir aou, lo prézidan la di i sar donn shak vié pèrsone sak nana in pti rotrèt in lavans dé san éro. Alor, kossa wi sar di la ? Bouz aou éstèr ! Out momon, ma pov sèr Zéfine, nora di alé zoué la marèl zour-la plito k’fé aou.

Mon vié matante, wi pran ankor makaroni pou la bouzi ? Po d’shanm pou pla kouvèr ?
Ousa i sa tir larzan-la, épi kissa i sar pèy sa : ou kroi i pèy avèk la krash don ? Si ou lé pa o kouran, sé la sékirité sosial k’i sar pèy sa. Ou koné la sékirité sosial koman i lé ? Lé o-ki. Pétète l’Éta va fé lavans ? L’Éta lé oki, galman. Toulfason, sé bann travayèr k’i sar pèy sa va goumant lo CSG, in poin sé tou.

Matante, wi koné bien, ou k’i ramas out larzan dann pèz-tété. Ébin, kan na pi, na pi. Na poin sogré la-dan ! Tank’a out bann kozman an zobok, ou na ka gard sa pou ou, sansa pou out vié shien na pi lo dan sak wi apèl Ponpon.

 Justin