Dèrnyé miniss prézidan la nome ali trozour-la épi ala ké li nome in n’ote. I pâré i apèl sa la valss porte-fèye, osinonsa la valss bande makaron. Si sé in valss, mi panss zot néna ka valss toussèl é si sa i fé azot di bien, mwin sa i déranz pa mwin.

Pou koué ?

Pars pou mwin lapa banna va trouv solission pou noute problème sé nou k’va trouvé a kondission ké nou néna lo pouvoir é ké ni krèz in pé noute koko pou trouv lo bon solission pars konm inn dé téi di : Paris i komande pa nou ! Malorozman li komande anou mé son komandman la pa lo méyèr ki soi.

Mézami si mi di sa, sé ké néna zégzanp dovan nou : shak foi k’in n’afèr la dévlopé sé pars lo péi d’outre-mèr l’avé in pouvoir. Lé pa ké dann l’outremèr na pwin déssèrtin pou fé dé kouyonade mé souvan lo kouyonade lé fé an akor avèk Paris o sèrviss bande néo kolonyo é pa o sèrvis lo péi l’outre-mer. Si in moune i di amwin Didier Robert la fé dé kouyonade, mi réponde oui ; si i di amwin li la fé dé kouyonade par son léspri d’outre-mèr in pé boush-boushé.

Mon réponss ?

La pa sa, mé pars Paris la ankouraz ali pran bande shomin torte é mi panss sé so koté — la k’i fo roshèrch la vérité. Pars sansa pou kossa lo pouvoir santral la fé toute sak li pé pou anpèsh Paul Vergès kontinyé son bande bon program té bon pou la Rényon ? Sinploman pars noute kamarade téi par pa dann sanss la politik kontoir. Mi done mon tète a koupé ké sé sa !

An atandan lo nouvo miniss mwin lé ni pou li, ni konte li, mi koné sinploman la valss porte-fèye i amenn ali issi sé zour-si, apré v’amenn ali in n’ote koté pou in n’ote porte fèye é pandan tan-la, konm i di, kabri i manz salade.

A bon antandèr salu !

Justin