An réalité mi panss lo problèm lé mal pozé si li lé pozé konmsa. La Rényon, konm zot i koné i soufèr d’in mal-dévlopman donk i fodré amélyor son kalité d’dévlopman. Ni pé dir ankor akoz pa vérifyé si lo paké d’voiyan lé o rouj, sansa oranj fonssé, la vni vèr pandan lo manda osinonsa si zot i raprosh pa lo tan bann voiyan va vir o vèr… mèm si kan lo zélékssion i ariv zot lé ankor dann rouj.

Alon pran in légzanp :alon anparl lilétrism.Sa sé in voiyan lé dann rouj dopi in bon koupe de tan.Lo manda i pass,sète Prézidan La Répiblik, é ni apèrssoi lo voiyan lé dann rouj é si la promète anou diminyé lilétrism, si par égzanpe lo nonb zilétré la diminyé sinkante pour san é si ni pé éspèr vèrdi voiyan la oboute in dézyèm manda. Ni pé dir wala in sakré réissite…. Poitan ni koné lo voiyan v’arète oranj fonssé donk zéro réissite pwin d’réissite.

Ni pouré anparl galman pou la sirkilassion, pou lojman, pou la santé,pou lékonomi d’prodikssion, pou lo nonm zinzényèr. Wala inn bone fasson ziz lo bann zélu sète La Rényon épi sète lé dann gouvèrnman laba dan La franss.

In tan l’avé lo plan é sak téi rode sé réaliz bann zobjéktif lo plan.Mé na pi lo plan… Noute parti i propoz fèr avèk bann fors viv in plan d’dévlopman avèk a la klé in loi program tèl fasson ni trape in dévlopman korèk… Ni oi bien lo plan lé pankor fé épi la loi-program lé pa voté é lé ankor loin. Donk ni pé dir mèm si bann konsèye, osinonsa bann komine, épi lo gouvèrnman la nyabou fèr déssèrtènn réalizassion nou lé sirésèrtin o boudikonte nou sar loin ankor d’in dévlopman korèkt. Donk an plin dann in bilan négatif !

Bilan korèk sansa pa korèk ?Pa korèk biensir d’in poinnvizé di dévlopman.A bon antandèr salu !