Na pwin lontan-inndé somenn par-la mwin la lir in lartik dann nout zoinal dsu la plantassion lo blé dann l’Ethiopie, avèk in linformassion konm de koi pays-la va gingn produi assé lo blé pou son lotosifizans é mèm li va gingn ésporté d’issi l’ané proshène. Biensir avèk bande nouvo kalité lo blé myé adapté avèk lo klima sho, épi sèk, kaziman subdézèrtik.D’apré sak mwin la lir bande varyété lo blé i mète sa o poin dann déssèrtin laboratoir afrikin. I fo par-la dizan pou mète o poin in varyété lo blé adapté avèk in klima sibdézèrtik . Mé lo ka l’Ethiopie lé intéréssan pars nout toute i rapèl le shanté : « L’ethiopie i mor pézapé » dann in tan li téi soufèr la famine.

Talèrla, mwin té apré rode-rodé dsu l’internet é ala ké mi trouv kékshoz intéréssan touzour dan lidé d’lotosifizans alimantèr. Bande shèrchèr marokin dann l’inivèrsité Rabat la mète o poin in kalité lo blé dir bien adapté avèk la shalèr. Koméla, dann plizyèr péi l’apré fé léspèryans plante varyété-la é an parmi néna lo Sénégal in péi lé pa ditou abityé plante séréal-la é oila kossa mi lir :

- blé-la i pran trois mois dopi lo semaz ziska la rékolt avèk in randman lé bon épi i vien an konpléman rante dë plantassion do ri.. Biensir lé ankor apré éspérimanté mé lo rézilta lé ankourajan é i done léspoir bande péi l’afrik apré travaye pou zot lotosifizans alimantèr é konm mwin la lir dann nout zoinal la bank afrikène pou lo dévlopman i invésti bonpé dann la prodikssyon agrikol, ni pé an avoir léspoir noute bande frèr é sèr lafrik i ariv inn-sé-zour a zigil la famine dsu zot kontinan.

L’èrla mi di :akoz pa nou,akoz pa Madégaskar,Moriss, komor, Séssèl, l’Indyalnosséani,akoz pa toute bannzil tropikal si zot néna la volonté politik.Akoz ni arivré pa an avoir nou ossi noute sossyété d’abondanss.. Antouléka mwin pèrsonèlman mi kroi plizanpliss lotosifizanss alimantèr-in mo d’orde nout parti kominiss konm mi yème a dir.

A bon ékoutèr :salu !