Matante Zélida la ékrir Justin :
Mon shèr nové, mon spès salté,
moin la pa antandi bann rouj-de-fon bate tanbour déssi in n’afèr lé bon pou bann maléré. Ou i voi pa kossa mi vé dir ? Ou la pa antandi : sak i gingn lalokasyon lozman i sava toush in prime 150 éro ? A bon ! Toultan zot l’apré krétik lo pti t’onm k’i diriz la Frans, pars solon zot, li lé anti-sosyal. Lèr li pran in bon désizyon,zot i koz pa, zot i fé konmsi zot la pa antann aryin. Konm di le patoi : martin ki kouzi*, zorèy koshon dann marmite poi !

Justin la fé po répons :
Mon vyé matant touzour dan lérèr,
kèl zorèy koshon dann marmite poi ? Kèl martin ki kouzi ? Mi pans pa i fo bate tanbour kan gouvèrnman i pran in désizyon konm sa, pou o moins dé rézon. Promyé rézon, kan i fé in sort sharité konmsa, i obli goumante konm k’i fodré bann z’alokasyon, é bann famiy i gingn pa baz la-dsi pou byin jère z’ot bidzé. Dézyinm rézon : le prime i tonm an mèm tan k’in éléksyon, konm dann tan lontan, lo tan larzan karné, lo tan kinzène shomaz. Konmsa, i détourn lo vote bann moun mizèr, mèm si sa i ansèrv konm in pansman déssi in zanm dé boi.

Justin

(*) Kan i koup filé martin, i pé amontr ali kozé, mé kan i koude son déyèr, i prétan li koz pi ditou.