Matant Zélida la ékrir Justin :
Mon shèr nové, mon spéss salté, rouj-de-fon dovan l’étèrnité, mi konpran pa pou kosa zot i azite azot konmsa, zot i bouz konmsa, zot i brass zidé, é zot i prétan konmsa égzis dann péizaz politik rényoné. Néna dé foi moin lé a d’mandé pou kosa ankor fèr in n’afèr konmsa. Mon nové, néna in moman pou énète, in moman pou grandi, in moman pou amenn inn vi konm adilt, épi in zour néna la rotrète é o bout la pa bézoin mi éspli k aou kosa i ariv. In parti lé konm in moun é ni vé ni vé pa, ariv lo zour pou disparète. ni vé, ni vé pa, lé konmsa é pa otroman. La nostalzi lé toksik momandoné. Tok ! Pran sa pou ou !

Justin la fé pou répons :
Mon vyé matant, k’i koz touzour la boush rouvèr, mi antan bien sak ou i di mé mi pans pa isi La Rényon lé shoz va pass konmsa, konm ou i pans dann rokoin out koko. Pou kosa d’apré ou ? Pars sinploman si in moun i suiv listoir la Rényon épi sète parti kominis rényoné, li sré étoné rann ali kont tout sak lo parti la fine maziné, prévoir, konstrui. Si téi fé in gran liv pou nout l’avnir, mi pé dir aou noré dé paz é dé paz dsi parti kominis rényoné, sansa parti kominis rényoné la fine ékri par avans. La pa arienk dann listoir La Rényon pou trouv ali, mé galman dann prézan épi dann fitir. Fransh vérité matant, i vé, i vé pa, mé nout parti la pran in rol éspésyal dann la vi lo pèp rényoné, pou konsèrv son valèr, pou konfort son rézistans, pou prépar son l’avnir. Mi pans ni pé dir si l’avé poin parti kominis lo pèp rényoné, son kiltir, son konsyans nora pa été sak li lé zordi. Alé ! Pran sa pou ou é mète out moushoir par dsi.