Kan i antan demoun kozé — pa tout, byin sir, mé in bonpé, mi pans mèm in gran majorité dmoun — i pans in parti sa i ansèrv de riyin. Pou tousa dmoun-la, lo mèr, sa i ansèrv, in konséyé zénéral, in dépité sa lé itil. La plipar d’tan, bann sitoiyin i pans bann zélu, sa in bann moun, ou i sava oir azot kan ou nana in n’afèr pèrsonèl pou demandé, é in parti non !...

Poitan, in parti-la, sa in n’afèr lé inportan, si sa i marsh byin. Ou i pé vnir aport out zidé déssi lo prézan épi l’avnir out landroi, out péi, mèm pli loin k’sa ou i pé di out lopinyon déssi l’avnir l’imanité.
Ou i pé diskité é mèm fé partaz out l’opinyon, sansa partaz l’opinyon in bann dalon.
Dann in parti, ou i pé komans fé shanz lé shoz lé krétikab épi défann bann z’afèr ou i trouv lé bon konm i lé. Dann in parti, i roganiz la lite !

Byin sir, in parti i done pa la kaz, i done pa manzé, i done pa larzan, i done pa travay non pli, sa lé pa son rol-sa ! Mé li batay pou sa épi pou tout sak lé inportan dan la vi dmoun.
Alor, in parti, pou moin, sa sé in n’afèr inportan, sa sé in n’afèr i fo ranfors ali toultan, toultan amélyor son manyèr fonksyoné. Bou di kont, in sakré zoutiy pou la démokrasi, in zoutiy k’i fo manyé byin konm k’i fo !

Justin